ست عادية عايشة في بلدي ... على رصيف ... بلدي
التنازل
--------
بتنازل عن مصريتي
علشان آخذ حريتي
و أقدر في بلدي أعيش أنا
طناشي هو سكتي
بتنازل عنك يا بلادي
و ليكي حبي من فؤادي
بس عشان أعيش أنا فيكي
الظلم لازم يبقى زادي
هما عملوا كده معاكي
قتلوا ولادك من جواكي
حتى الكلمة بيمنعوها
و السُكات حلال وياكي
إتنازلت وكلي غل
خايفة أعيش وأموت في ذل
خايفة أقول نِفسي وياريت
ألاقي نفسي بس ظل
بتسألوني إتنازلت ليه
طيب أعمل إيه والا إيه
أهلي عيلتي وعزوتي
تاريخي آه و خايفة عليه
جوه بلادنا ملناش مكان
دي مش بلدنا من زمان
من زمان عايشنها آه
بدون هوية ولا عنوان
يا خُسارة يا بلدي ليه
الظلم ليه ساكتة عليه
ثوري يا بلادي يالا
قومي يعني هيحصل إيه
بيضربوا في الميت عادي
طب ما مات خلاص يا بلادي
قولي لأ قولي حرام
ما تقوليش خلاص و تفادي
إتنازلت وكنت نِفسي
ألاقي فيكي يا بلدي نَفسي
ألاقي حقي ألاقي عيشي
ألاقيكِ عايشه جوه نفسي
عارفه ليه يا بلدي بعت
لأني فيكي تهت..ضعت
كنت فاكره أني في حماية
كنت فاكره إني انتصرت
و لسه في كلام كتير
كنت بحلم بالتغيير
كان نفسي أقول و أقول و أقول
بس في ناس ملهاش كبير
لو قلت لأ يقولوا آه
لو قلت حق يقولوا لا
لو حتى فكرة في الدماغ
يبقى اعتقال مدى الحياة
بقى أنتي مصر يا مصر ياللي
تاريخ عظيم مذكور تملي
إيه جرى في الدنيا إيه
قتلوا حسي خنقوا ظلي
إتنازلت ودي نهايتي
والحكاية دي حكايتي
والكلام هو الكلام
لكل واحد زى حالتي
والكلام هو الكلام
لكل واحد زى حالتي
منار
10-4-2008
القاهرة
الساعة 1 ظهرا
-----------------------------
ربنا يستر وممكن تبدأوا تحضرولي العيش و الحلاوة :))
ليست هناك تعليقات:
إرسال تعليق