« اللي فلت عياره »
بتربي في المتربي
و تطبطب ع اللي فلت عياره
وانفلت من بين دياره
تكسب الوكسة
ونكسة توكس المخنوق ف داره
تتلهي في نهار بهدمو مهربده
تحلم في يوم بالبغدده
تقلع ىدوم العربده
وتجوز نوسة ومسعده
***
تنسى حالك واللي جالك
م القضايا المتشالالك
والرغيف يصبح قضية
تنسى بيها ما جرالك
يدوس عليك قطر الحياة
مايسيبش فيك ولا نص آه
تديك طريق وفي منتهاه
تلقى النهاية ىي البداية
طاحناك رحاية يا ولداه
***
يا ابن آدم ياللي الخطايا مبهدلاك
رمم قلوعك
امسح دموعك
احمد لربك ع اللي معاك
توبو نصوحة تطهرك
وتنشلك من الهلاك
باصص وراك
ومش شايف
قصادك بير غويط
تنفلت رجلك
تقع
تلزق في حيط
تصرخ
يعلى صوتك
ومين يا ولدي يسمعك
ما انت اللي مشيت في سكة غامقة
مافيها حد يرجعك
***
ياللي مش واخدلي بالو
وماشي يعمل مابدالو
وناسي ان العين عليو
صاحية مبحلقة وواعيالو
فوق يا ولدي سِكِتك ممكن تديق.. وبدل ماتكون غطاس
في الحياة.. تصبح غريق
***
منار شملول
ليست هناك تعليقات:
إرسال تعليق